台灣語文測驗中心目前是設立tī國立成功大學研究總中心底下自負盈虧ê獨立中心，2010年3月23日正式經評議委員會議通過成立。伊ê經費來源主要是委辦計畫單位ê經費、考生報名費kap熱心人士ê捐款等。

本中心ê宗旨是beh促進台灣語文教學kap檢定考試品質ê提升thang發展台灣語言文化koh呼應聯合國《世界文化多樣性宣言》內底對各語言族群文化保障ê精神。

本中心前身是由全國二十外个學術單位、社團組成ê「全民台語檢定聯盟」註1 hām配合教育部委託辦理「臺灣閩南語語言能力認證試題研發計畫」（教育部台語字第0970074259號函）所成立ê國立成功大學文學院台灣語文測驗中心。國立成功大學台灣語文測驗中心目前是全國第一个專業台語文認證常態性機構。教育部2010 kap 2011年辦理ê臺灣閩南語認證考試原型就是國立成功大學台灣語文測驗中心所研發設計。中心目前已開辦全民台語認證(國內)、國際台語認證(國外)、中小學生台語認證(國內)。因為成大台灣語文測驗中心ê研發團隊來自全國各大學、學術機構、台語文社團ê菁英，而且bat接受教育部委託研發試題kap接受各縣市政府委託辦理台語檢定，所以伊ê專業性hām權威性深深受tio̍h各界肯定，所頒發ê台語級數證書mā得tio̍h真濟機構採認。

※ 註1：「全民台語檢定聯盟」當年加盟單位包含：台南神學院、洛杉磯台灣會館、成功大學台灣文學系、中山醫學大學台語文學系、真理大學、台灣羅馬字協會、台灣教會公報社、交通大學東亞語文研究室、台灣師範大學台灣文化及語言文學研究所、長榮大學、台東大學華語文學系、台灣基督長老教會總會母語推行委員會、財團法人李江卻台語文教基金會、台文通訊、高雄醫界聯盟、波士頓台語進步社、台南社區大學、台灣母語教師協會、長榮高級中學、長榮女子高級中學、金安出版社、日本台灣語聯誼會等等。